ოვერნული ბრაკი – მოკლებეწვიანი, ძლიერი აგებულების მეძებარია რომელსაც საფრანგეთის მაღალმთიან რეგიონებში, ძირითადად, წვრილ ნადირ–ფრინველზე სანადიროდ იყენებენ. მსხვილი ზომის მიუხედავად, ბრაკი მსუბუქი და ელეგანტური ძაღლის შთაბეჭდილებას ტოვებს. რბილი ხასიათის წყალობით, ყოველგვარი ძალდატანებისა და სიმკაცრის გარეშე, პატარა ასაკიდან წვრთნიან და გეშავენ. ამ ჯიშია ძაღლებს შესანიშნავი ყნოსვა აქვთ, კარგად მუშაობენ კვალზე (უხმოდ), არ ერიდებიან წყალს; ენერგიას გამოზომილად ხარჯავენ და დაუღლელად დიდხანს ნადირობენ. ამასთან ერთად, ოვერნული პოინტერი მოსიყვარულე, ალერსიანი, პატრონზე მიჯაჭვული კომპანიონია. ოვერნული ბრაკი ბინის პირობებშიც ადვილი შესანახია

ექსტერიერის ძირითადი შტრიხებია:

თავი – დრუნჩი აქვს ზომიერად გრძელი, თავის ქალა განიერი, შუბლიდან დრუნჩზე გადასვლა ნაკლებად გამოხატული, ცხვირის კეხი სწორი, ლაშები მძიმე.
თვალები – საშუალო ზომის, მუქი ყავისფერი, ქუთუთოები შავი.
ყურები – საკმაოდ გრძელი, ნაკეცებიანი; ქვემოთ დაყენებული, ჩამოკიდებული, ღაწვებზე მჭიდროდ მიკრული.
კისერი – საკმაოდ გრძელი და ძლიერი, შეუმჩნეველი ღაბაბით.
ტანი – კორპუსი ძლიერი კონსტრუქციის, კვადრატული ფორმატის, მკერდი ღრმა, ნეკნები გამობურცული. ზურგი მოკლე და სწოორი. წელი მოკლე, ოდნავ ამობურცული, კარგად განვითარებული მუსკულატურით. გავა ფართო, ძლიერი, ფაქტობრივად, დაქანების გარეშე.
კიდურები – მსხვილძვლოვანი, დაკუნთული. თათები კომპაკთური, შეკრული თითებით, უხეში ბალიშებით.
კუდი – საშუალო სისქის, ერთი მესამედი კუპურებული.
ბეწვი – მოკლე, ნაკლებად რბილი, მაგრამ არაუხეში.
ფერი – თეთრი შავად დაწინწკლული; თეთრი შავი წინწკლებითა და დიდი შავი ლაქბით; ნაცრისფერი ჭაღარით; ნაცრისფერ–ჭაღარა დიდი შავი ლაქბით. თავი ყოველთვის შავი, უმნიშვნელო თეთრი ლაქით.
ზომა – ხვადების სიმაღლე 57–63 სმ, ძუების – 55–60 სმ. წონა 22–25 კგ.